PM Divyangjan Pension Yojana 2026: Ab 40% Viklangta Par Bhi Pension, Rs 375 Mahina (80+ Ko Rs 625); Janm Se Milegi - Cabinet Ki 14 October Ki Manzoori, Guideline 3 Mahine Me

PM Divyangjan Pension Yojana 2026 - 40% Viklangta Par Rs 375

Kendra sarkar ki viklang pension ke niyam badal gaye hain: Union Cabinet ne 14 October 2026 ko manzoori di ki ab 40% viklangta wale ko bhi pension milegi (pehle 80% chahiye thi), rashi Rs 375 mahina hogi aur 80 saal se upar walon ko Rs 625. Umar ki neeche ki seema bhi hata di gayi - pension janm se mil sakegi. Yojana ka naam ab Pradhan Mantri Divyangjan Pension Yojana hai (pehle Indira Gandhi National Disability Pension Scheme - IGNDPS).

Bhaiyon, ek baat pehle saaf: ye manzoori hai, abhi laagu niyam nahi. Cabinet ke shabd hain ki nayi guideline 3 mahine me jaari aur laagu hogi. Tab tak koi naya form nahi hai, aur jo aaj "naya form bharwa dete hain" bol raha hai, wo galat bol raha hai. 15 October 2026 ko humne PIB ki release (ID 2323264, 14.10.2026) khud padhi - neeche ki har baat usi se hai.

Divyang Pension Me Kya Badla - Ek Nazar Me

"Ab tak" wale column ki rashi NSAP ki ab tak ki dar hai; release khud kehti hai ki viklangta ki sahayata doosri samaan yojanaon se 25% zyada honi chahiye - Rs 300 ka 25% zyada Rs 375, aur Rs 500 ka Rs 625.

Divyang Pension 40% Viklangta Par Kyun - RPwD Act 2016

Release ke mutabik ye badlav Rights of Persons with Disabilities Act 2016 ki wajah se zaroori tha. Kanoon ne viklangta ki sahayata ko "Benchmark Disability" - 40% se joda hai, aur kaha hai ki viklang ki sahayata baaki samaan yojanaon se hamesha 25% zyada ho. Purani yojana 80% (gambhir ya bahu-viklangta) par atki thi - yani 40-79% wale kendra ki pension se bahar the.

Iska seedha matlab: jinke paas 40% ya zyada ka praman-patra ya UDID card hai, wo nayi guideline ke baad is yojana ke daayre me aa sakte hain. UDID abhi se bana lijiye - swavlambancard.gov.in par muft hai.

Divyang Pension Ab Janm Se - Bachchon Ke Liye Bada Badlav

Pehle kendra ki viklang pension 18 saal se milti thi. Ab release kehti hai: "Minimum age criterion for the disability pension will now be since birth." Yani viklang bachche bhi daayre me aayenge - mata-pita ke liye ye sabse bada badlav hai. Bachche ke liye aavedan kaise hoga, kis khate me paisa jayega - ye guideline batayegi.

NSAP Ke Saare Naye Naam

Cabinet ne poore National Social Assistance Programme ko 2026-27 se 2030-31 tak, Rs 53,428 crore ke kharch ke saath jaari rakhne ki manzoori di, aur naam badle:

Vridha, vidhwa pension aur parivar labh yojana "apne maujooda roop me" chalengi - unki rashi ya shart me koi badlav nahi. Release ke anusar kul 3.20 crore labharthi (36 rajya/UT) is manzoori se jude hain - ye poore NSAP ki sankhya hai, sirf viklang pension ki nahi.

Bihar Me Divyang Pension Wale Ab Kya Karein

Bihar me divyang ko rajya sarkar ki apni pension SSPMIS se milti hai - uski shart pehle se 40% hai. Kendra ki nayi rashi Bihar ki rajya pension ke saath kaise judegi, ye release me nahi likha; guideline aane par hi pata chalega. Tab tak:

1. Pension chal rahi hai to kuch mat badliye - e-Labharthi par payment dekhte rahiye
2. Pension nahi milti aur 40%+ viklangta hai to rajya yojana me abhi aavedan kar sakte hain - Bihar divyang pension apply
3. UDID card aur Aadhaar-seeded bank khata taiyar rakhiye - nayi yojana me bhi yahi kaam aayenge

Scam Warning

• "PM Divyangjan Pension ka naya form, Rs 500 do" - guideline abhi aayi hi nahi; koi naya form nahi hai
• "Viklangta 40% likhwa denge" - farzi praman-patra apradh hai
• Aavedan ya status ke liye sirf sarkari portal - koi agent ya WhatsApp link nahi

Shikayat: cybercrime.gov.in | 1930

FAQs

Q: Divyang pension ke naye niyam kya hain? A: Cabinet (14.10.2026) ke anusar viklangta ki shart 40% (pehle 80%), rashi Rs 375 mahina (80+ ko Rs 625), aur pension janm se.

Q: Kya naye niyam abhi se laagu hain? A: Nahi - guideline 3 mahine ke andar jaari aur laagu hogi.

Q: IGNDPS ka naya naam kya hai? A: Pradhan Mantri Divyangjan Pension Yojana.

Q: 80 saal se upar walon ko kitna milega? A: Rs 625 mahina kendra ki sahayata.

Q: Kya bachchon ko bhi viklang pension milegi? A: Haan - umar ki shart ab "janm se" hai; aavedan ka tarika guideline me aayega.

Q: Kya vridha aur vidhwa pension bhi badli? A: Nahi - sirf naam badla, rashi aur shart wahi.

Q: Naye niyam ke liye form kab bharna hai? A: Abhi koi form nahi - guideline ka intezaar kijiye; UDID aur bank khata taiyar rakhiye.

Q: Bihar ki rajya divyang pension par kya asar hoga? A: Release me Bihar ka zikr nahi - guideline ke baad saaf hoga. Rajya pension abhi jaise chal rahi hai, chalegi.

Zaroori Links

• PIB release - Cabinet approves continuation of NSAP (14.10.2026)
• UDID card - swavlambancard.gov.in

Ye Bhi Zaroor Padhein

• Bihar divyang pension - apply aur status
• UDID card aur viklang praman-patra Bihar
• Bihar battery tricycle yojana - divyang
• Divyang Top Class scholarship 2026-27
• Rashtriya Parivar Labh Yojana Bihar

Source: 15 October 2026 ko khud padha - PIB release ID 2323264, "Cabinet approves continuation of the National Social Assistance Programme for five years from 2026-27 to 2030-31", 14 October 2026, 4:06 PM (link): naye naam, Rs 375/625, 40% aur janm se, 3 mahine me guideline, Rs 53,428 crore, 3.20 crore labharthi, RPwD Act 2016 aur 25% niyam. Purani dar (Rs 300/500, 18 saal) NSAP ki ab tak ki dar hai.